اسلام آباد۔1ستمبر (اے پی پی):صدر مملکت ڈاکٹر عارف علوی سیلاب آلے علاقیں دا جائزہ گھنݨ کیتے ملک دا دورہ کریندے پئن۔ایوان صدر دے پریس ونگ توں جاری بیان موجب صدر مملکت اڄ جنوبی پنجاب ، سندھ تے بلوچستان اچ سیلاب آلے علاقیں دا دورہ کریسن ۔صدر مملکت کوں ڈیرہ غازی خان ، نصیر آباد اتے سکھر اچ سیلاب دی صورتحال تے بریفنگ ݙتی ویسی ۔ صدر عارف علوی سیلاب دے علاقیں دا فضائی جائزہ وی گھنسن۔صدر مملکت ریلیف کیمپاں دا دورہ کریسن ، سیلاب زدگان نال ملاقات کریسن ۔صدر مملکت سیلاب زدگان کوں سہولتاں ݙیوݨ تے انہاں کوں پیش آندے مسئلیں ڄاݨݨ کیتے انہاں نال ملاقات وی کریسن ۔گزریل ݙینھ صدر مملکت خیبرپختونخوا اچ سیلاب زدگان دی امداد تے بحالی کیتے کوششاں دا جائزہ گھنݨ سانڳے دورہ کیتا ہئی ۔ صدر مملکت قوم تے عالمی برادری توں سیلاب زدگان دی دل کھول تے مدد کرݨ دی اپیل کیتی ہئی ۔صدر مملکت آندے سیلاب توں بچݨ تے سیلاب زدگان دی تکھے بحالی کیتے اقدامات دی لوڑھ تے زور ݙتا ہئی۔
