راولپنڈی۔28اکتوبر(اے پی پی):خیبرپختونخوا اچ دہشت گردی دے ݙو انڄ واقعات اچ 2 فوجی جوان شہید تھی ڳئن جݙاں جو ایں دوران ھک دہشت گرد جہنم واصل اتے 2دہشت گرداں کوں گرفتار کر ڳھدا ڳئے ۔ پاک فوج دے شعبہ تعلقات عامہ (آئی ایس پی آر) توں جاری بیان موجب خیبر دے ضلع تیرہ دے عمومی علاقے اچ خفیہ معلومات دی بنیاد تے آپریشن کیتا ڳئے تے شدید فائرنگ دے تبادلے دے بعد ھک دہشت گرد کوں جہنم واصل کرݙتا ڳئے ، جݙاں جو ݙو دہشت گرد زخمی تھی ڳئن تے انہاں کوں سکیورٹی فورسز گرفتار کر ڳھدے۔ آئی ایس پی آر دی پریس ریلیز اچ آکھیا ڳئے جو انہاں دہشت گرداں توں اسلحہ تے گولہ بارود وی برآمد کیتا ڳئے ، اے دہشت گرد سکیورٹی فورسز دے خلاف دہشت گردی دیاں کارروائیاں تے علاقے اچ نشوم شہریاں دی ٹارگٹ کلنگ اچ ملوث ہن ۔ آئی ایس پی آر دا آکھݨ اے جو ھک ٻئے واقعے اچ جنوبی وزیرستان دے ضلع سرویکئی دے عمومی علاقے اچ دیسی ساختہ بم پھٹ ڳئے جیں دے نتیجے اچ 2بہادر جوان شہید تھی ڳئن ۔ شہید تھیوݨ آلیں دے ناں سپاہی بنارس خان (عمر 23 سال، ساکن ضلع اورکزئی) اتے سپاہی عبدالکریم (عمر23 سال، ساکن ضلع خیبر) ہن۔پریس ریلیز اچ مزید آکھیا ڳئے جو “علاقے اچ موجود دہشت گرداں کوں مکاوݨ سانڳے سینی ٹائزیشن آپریشن کیتا ویندا پئے کیوں جو پاکستان دی سکیورٹی فورسز دہشت گردی دی لعنت کوں منڈھوں مکاݨ کیتے پرعزم اے تے ساݙے بہادر سپاہیاں دیاں قربانیاں ساݙے عزم کوں مزید تکڑا کریندن ۔
