اسلام آباد۔6اکتوبر (اے پی پی):وفاقی وزیراقتصادی امورسردارایازصادق آکھیے جو پاکستان امریکہ دا طویل المعیاد شراکت دار اے اتے اساں امریکہ نال آپݨے تعلقات ودھاوݨ چاہندوں، انہاں اے ڳالھ اتھاں پاکستان اچ امریکہ دے سفیر ڈونلڈ بلوم نال ملاقات اچ آکھی اے ۔ وفاقی وزیر پاکستان اچ امریکہ دے سفیر دا پرتپاک استقبال کیتا۔ملاقات اچ سانجھی دلچسپی دے امور تے ڳالھ مہاڑ کیتی ڳئی اے ۔وزیر اقتصادی امور ݙوہیں ملکاں وچال لمبی مدت دوستانہ اتے خوشگوار تعلقات دی تعریف کیتی تے آکھیے جو اساں امریکہ کوں آپݨا طویل مدتی شراکت دار سمجھدوں ۔ حکومت پاکستان امریکہ نال تعلقات ودھاوݨ چاہندی اے وزیر اقتصادی امور سیلاب توں متاثرہ لوکاں دی امداد کیتے یو ایس ایڈ دی طرفوں ݙتی ونجݨ آلی امداد تے وی شکریہ ادا کیتے۔امریکی سفیر آکھیے جو ݙوہیں ملکاں وچال خوشگوار تعلقات امریکہ دے نال نال پاکستان کیتے وی اہم ہن اساں تجارت، سرمایہ کاری، توانائی، تعلیم اتے معیشت دے شعبیں تے زیادہ توجہ ݙیندے پیوں ۔ امریکی سفیر آکھیے پاکستان کنے ٻہوں زیادہ صلاحیت اتےاستعداد اے جیں کوں ڳولݨ دی لوڑھ اے ، امریکی سفیر پاکستان اچ تباہ کن سیلاب توں جاناں دے ضیان تے وݙے پیمانے تے تھیوݨ آلی تباہی تے ݙکھ دا اظہار کیتے ۔ امریکی سفیر وزیر کوں یو ایس ایڈ دے ذریعے امریکہ دی طرفوں ݙتی ونڄݨ آلی سیلاب متعلق امداد بارے ݙسایا تے آکھیے جو امریکہ موسمیاتی لحاظ نال موزوں تعمیر نو اچ مدد کریسی ۔
