اسلام آباد۔18اکتوبر(اے پی پی)وفاقی وزیر منصوبہ بندی، ترقی و اصلاحات اسد عمر آکھیے جو حکومت لوکاں کوں سوکھ ݙیوݨ کیتے اہدافی رعایت تیار ڳھدن، ودھدا مہانگ کلہا پاکستان دا نئیں پورے ڄڳ دا مسلہ اے، ڄڳ اچ ایں ویلھے پٹرولیم مصنوعات دا ملھ اتے مہانڳ پاکستان توں ٻہوں ودھ اے، امید اے جو عوام کوں مارچ تئیں مہانڳ توں ریلیف مل ویسی، حکومت پٹرول اتے ڈیزل تے جی ایس ٹی 17 فیصد توں ڳھٹ کر تے بالترتیب 6.8 اتے 10.3 فیصد کیتے، خوردنی تیل دا ملھ تیکھے 45 توں 50 روپے فی لٹر ڳھٹ ویسی، سندھ حکومت اٹے دے مل اچ کمی سانڳے تیکھے اٹا ٻاھرو کݙھے۔ اے ڳالھ انہاں پریس کانفرنس اچ آکھی۔ انہاں آکھیا جو ایں ویلھے پورے ڄڳ اچ مہانگ دی لھر اے، تیل، کھاوݨ پیوݨ دیاں شئیں مہانگیاں تھین۔ انہاں آکھیا جو مہانگ دی وجوہات وی ݙیکھݨیاں ہوسن جو کرونا عالمی معیشت تے کیا اثرات سٹین؟ پورا نظام خراب تھئے بھل ڄݙاں معمولات بحال تھین تاں ہر شئے دی مانڳ ودھی اے اتے قلت تھئی اے، ڄڳ اچ کروڈ آئل دا ملھ 81.55 فیصد ودھیے، اے پاکستان اچ 55.17 فیصد ودھیے، گیس دا ملھ 135 فیصد ودھیے بھل پاکستان اچ گیس دا ملھ نئیں ودھیا۔ کھنݙ دا ملک عالمی سطح تے 53 فیصد اتے پاکستان اچ 15 فیصد ودھیے۔
