اسلام آباد۔15نومبر(اے پی پی) نگراں وفاقی کابینہ سعودی عرب اتے قطر نال ݙوطرفہ سرمایہ کاری معاہداں تے مذاکرات، حج پالیسی 2024 اچ ترامیم، جموہریہ کانگو، ملاوی، زیمبیا، زمبابوے اتے جمہوریہ کرغز سودھا مختلف ملکاں کوں بزنس ویزہ لسٹ اچ رلاوݨ دی منظوری ݙتی اے۔ اے منظوری اسلام آباد اچ نگران وزیر اعظم انوار الحق کاکڑ دی اڳواݨی اچ وفاقی کابینہ دے اجلاس اچ ݙتی ڳئی۔ کابینہ حج پالیسی 2024 اچ ترامیم دی منظوری ݙتی جیندے اچ سرکاری اتے نجی سکیمز دا غیر استعمال شدہ سپانسر شپ کوٹہ سعودی عرب حکومت کوں ولا ݙتا ویسی اتے سعودی قوانین دے مطابق حج گروپس آرگنائزرز دے مالی انتظامات بارے فول پروف مانیٹرنگ سسٹم ٻݨایا ویسی ڄݙاں جو 10 سال توں ڳھٹ عمر دے ٻال وی حج کر سڳسن۔ کابینہ ہارڈ شپ حج کوٹہ اچ کمی دی منظوری وی ݙتی۔ وفاقی کابینہ فیڈرل بورڈ آف ریونیو دی سفارش تے بینکاں دے اُن وِنڈ فال منافع ڄیڑھا انہاں سال 2021 اتے سال 2022 اچ زر مبادلہ دے لین دین توں ڳھدا ہا، تے 40 فیصد ٹیکس لاوݨ دی منظوری ݙتی۔ وفاقی کابینہ ٹریڈ آرگنائزیشنز دے ریگولیٹرز دے احکامات دے خلاف اپیل سݨݨ، امپورٹ پالیسی آرڈر 2022 اتے ایکسپورٹ پالیسی آرڈر 2022 دی شرائط اچ چھوٹ اتے نرمی کیتے کمیٹی ٻݨاوݨ دی وی منظوری ݙتی جیندے کنوینئر وزیر تجارت ہوسن اتے ارکان اچ وزیر قانون، وفاقی وزیر منصوبہ بندی شامل ہوسن۔
