اسلام آباد۔14دسمبر(اے پی پی) وفاقی وزیرخزانہ سینیٹر اسحاق ڈار آکھیے ملک اچ ٹیکساں دا دائرہ کار ودھاوݨ دی لوڑھ اے ، پاکستان اچ معیشت کوں سیاست توں انڄ کرݨا ہوسی۔ اے ڳالھ انہاں آزاد معیشت خوشحال پاکستان فورم توں خطاب کریندے ہوئیں آکھی اے۔ وزیر خزانہ اسحاق ڈار آکھیے کورونا وباء پاروں ٻہوں سارے ملکاں ٹیکس ریٹ کوں ودھائے ، اساں کنے وی ٹیکس ٹو جی ڈی پی ریٹ ودھاوݨ دے علاوہ کوئی ݙوجھا رستہ کائنی ،میں ایف بی آر دے ٹریک اینڈ ٹریس سسٹم دی مکمل حمایت کرینداں۔ کجھ صنعتی شعبیں اچ ٹیکس دی رپورٹنگ دا ایشو وی اے، پاکستان کوں ٹیکساںدا دائرہ کار ودھاوݨ دی لوڑھ اے ۔ اسحاق ڈار آکھیے پنج سال پہلے اساں کتھاں ہاسے تے ہݨ کتھاں ہیسے ۔ گزریل 4 سالاں اچ اکنامک مینجمنٹ مکمل طور تے ناکام رہی، 4 سالاں اچ قرضے 30 کھرب توں 54 کھرب تئیں پڄ ڳئن ۔ دنیا دے ٻہوں سارے وݙے ملکاں دا قرض ٹو جی ڈی پی پاکستان توں کتھائیں ودھ اے ۔ وفاقی وزیر آکھیے میں ٻہوں عرصے توں چارٹر آف اکانومی دا آکھدا پیاں، پاکستان اچ معیشت کوں سیاست توں انڄ کرݨا ہوسی ، کیا امریکا، جاپان یا برطانیہ اچ آکھیا ویندے جو انہاں دا ملک قرضیں اچ پھس ڳئے ، کیا بنگلہ دیش سودھے ٻئے ملکاں کرنسی مارکیٹ اچ مداخلت نی کریندے پئے، پاکستان دی حکومت کوں وی مارکیٹ اچ مداخلت کرݨی پوندی اے ۔اسحاق ڈار آکھیے سمگلرز اتے ہنڈی مافیا ملکی معیشت کوں یرغمال بݨایا ہویا اے ، چمن بارڈر تے یوریا تے وݙی مالیت دے ڈالرز دی سمگلنگ تھیندی پئی اے ، حکومت سمگلنگ دے خلاف آپریشن شروع کرݙتے۔ نجکاری دے قابل اداریں دی نجکاری کرݨی ہوسی ،کئی وزارتاں تے ڈویژنز نیب توں ݙردن ۔ انتظامی خرچے گھٹا تے قرضے ݙتے ونڄ سڳدن ،دفاعی خرچے نی گھٹائے ونڄ سڳدے ، قرضیں تے شرح سود دی ادائیگی دا مسئلہ پاکستان کوں ہے ۔انہاں آکھیے سبسڈی دا فیدہ عوام کوں تھیندے تے ہمسایہ ملک 300 یونٹ استعمال کرݨ آلیں کوں سبسڈی ݙتی اے ، اساکوں ٹارگٹڈ سبسڈی کرݨی چاہیدی اے تے برآمدات ودھاوݨ کیتے اپٹما کوں سبسڈی ݙتی ڳئی ۔
