اسلام آباد۔30اپریل(اے پی پی) پاکستان سودھے پوری دنیا اچ مزدوراں دا جگ ݙیھاڑ صبحائیں یکم مئی ٻدھ کوں منایا ویسی ۔ اے ݙینھ مناوݨ دا مقصد مزدور طبقے نال اظہار یکجہتی ، انھاں دے مسئلے مکاوݨ تے سہولتاں ݙیوݨ دے حوالے نال شعور اجاگر کرݨا اے ۔ انٹر نیشنل لیبر آرگنائزیشن دے اہتمام نال مزدور طبقہ دے مسئلیں دے حل سانڳے کوششاں جاری ہن ۔ واضح رہے جو 1889 اچ ریمنڈ لیوین دی تجویز تے 1890اچ پہلی واری یکم مئی کوں مزدوراں دا ݙینھ (ورلڈ لیبرز ڈے) مناوݨ دا اعلان کیتا ڳیا ہئی جیں دے بعد ہر سال پوری دنیا اچ اے ݙینھ منایا ویندے ۔ حکومت پاکستان یکم مئی 1972کوں پہلی واری باضابطہ طور تے سرکاری سطح تے یکم مئی کوں محنت کشاں دا ݙینھ قرار ݙتا ہئی جیں دے بعد ہر سال یکم مئی کوں پورے ملک اچ عام چھٹی ہوندی اے اتے پاکستان دے سارے محنت کش پوری دنیا دے محنت کشاں نال رل تے مزدور طبقے دی جدوجہد کوں کامیاب بݨاوݨ سانڳے 1886کوں شکاگو اچ آپݨی جاناں دا نذرانہ ݙیوݨ آلیں کوں خراج عقیدت پیش کریندن ۔ مزدوردے جگ ݙیھاڑ تے پورے ملک اچ سرکاری ، نجی اتے غیر منافع بخش اداریں دے اہتمام نال مختلف تقریباں، سیمینارز، ریلیاں ، جلسے اتے واک دا اہتمام کیتا ویسی۔
